पुणे | प्रतिनिधी Pune
भारतीय हवामान विभागाने (आयएमडी) दिलेल्या इशाऱ्यानुसार, अरबी समुद्रावरून येणाऱ्या बाष्पयुक्त वाऱ्यांमुळे आणि स्थानिक कमी दाबाच्या पट्ट्यामुळे राज्यात ढगाळ वातावरण निर्माण झाले असून, अनेक जिल्ह्यांना ‘यलो अलर्ट’ जारी करण्यात आला आहे. प्रामुख्याने विदर्भ, मराठवाडा, मध्य महाराष्ट्र आणि कोकणात वादळी वाऱ्यासह अवकाळी पाऊस आणि गारपिटीचा इशारा देण्यात आला असून पुढील ९६ तास संपूर्ण महाराष्ट्र ‘अलर्ट’वर राहणार आहे.
विदर्भातील अमरावती, चंद्रपूर, वर्धा आणि यवतमाळ जिल्ह्यांमध्ये ४० ते ५० किमी प्रतितास वेगाने वारे वाहण्याची शक्यता असून, काही ठिकाणी गारपिटीचा इशारा देण्यात आला आहे. मराठवाड्यातही सायंकाळच्या सुमारास मेघगर्जना आणि विजांच्या कडकडाटासह पाऊस हजेरी लावेल. मुंबई आणि उपनगरांमध्ये आर्द्रतेचे प्रमाण वाढल्याने काही ठिकाणी हलक्या सरी बरसतील, ज्यामुळे उकाड्यापासून काहीसा दिलासा मिळाला तरी नागरिकांना सतर्क राहण्याचे आवाहन करण्यात आले आहे. पुणे, सातारा, सांगली आणि नाशिक या जिल्ह्यांमध्ये ५० ते ६० किलोमीटर वेगाने वारे वाहण्याचा अंदाज असून, घाटांच्या परिसरात गारपीट होण्याची दाट शक्यता आहे.
दरम्यान, धुळे जिल्ह्याला मोठा फटका बसला असून, तेथे प्राथमिक अंदाजानुसार सुमारे ८ हजार १४५ हेक्टर क्षेत्रावरील पिके गारपिटीमुळे भुईसपाट झाली आहेत. साक्री तालुक्यातील ९ हजार शेतकरी बाधित झाले असून मका आणि उन्हाळी बाजरीचे मोठे नुकसान झाले आहे, तर धुळे तालुक्यातील कांदा उत्पादक शेतकरी संकटात सापडले आहेत. कोकणात आंबा आणि काजू पिकांच्या काढणीवर परिणाम होण्याची भीती व्यक्त होत आहे, तर मध्य महाराष्ट्रातील द्राक्ष आणि डाळिंब बागायतदार हवालदिल झाले आहेत.
हवामान तज्ज्ञांच्या मते, उत्तर भारतातून येणारी थंड हवा आणि दक्षिणेकडून येणारी बाष्पयुक्त उष्ण हवा यांचा संगम मध्य महाराष्ट्रावर होत असल्याने ही स्थिती ओढवली आहे. अशा परिस्थितीत शेतकऱ्यांनी काढणी केलेले धान्य सुरक्षित ठिकाणी साठवावे आणि नागरिकांनी वीज कडकडत असताना झाडाखाली उभे राहू नये, असा सल्ला देण्यात आला आहे. दरम्यान, नुकसानीचे तातडीने पंचनामे करून ‘आणेवारी’नुसार मदत जाहीर करावी, अशी मागणी आता जोर धरू लागली आहे.
